Isyung bayan, pag-usapan sa halalan.

Bulok ang pulitika ng bansa – ito’y tiyak na natin. Sa panahon ng kampanya sa eleksiyon, laman ng mga pahayagan, telebisyon at radyo ang mga paninirang-puri ng magkakalabang pulitiko. Batbat ang midya ng jingle at gimik para mapansin natin ang mga kandidato.

Pero tila nakakalimutan o hindi napag-uusapan ang batayang mga isyu ng bayan. Totoo, hindi masayang pag-usapan ang repormang agraryo, o polisiya sa ugnayang panlabas, o sa usapang pangkapayapaan. Pero ito ang batayang mga suliranin na kakaharapin ng mga pangulo. At ito ang naibabaon sa limot sa panahon ng eleksiyon.

Tungkulin ng alternatibong midya na iungkat ang mga usaping ito. Kung kaya magmula ngayong linggo hanggang sa bisperas ng botohan sa Mayo 10, 2010, maglalabas ang Pinoy Weekly ng mga ulat hinggil sa mga paninindigan ng mga kandidato sa pagka-presidente sa iba’t ibang batayang isyu ng bayan.

Husgahan sila batay sa kanilang mga pangako’t paninindigan, rekord at plataporma.

(Basahin ang una sa serye: “Mga pananaw sa repormang agraryo,” matapos ang jump.)