Ipinagdiwang ng grupong pangkababaihan na Gabriela ang International Day for the Elimination of Violence Against Women (Idevaw) kasabay ng deklarasyon kamakailan ng Pilipinas na National Consciousness Day for the Elimination of Violence Against Women and Children ang Nobyembre 25 kada taon.

Ikinatuwa rin ng Gabriela ang hatol ni Judge Emily Gaspar Gito ng Manila Regional Trial Court (RTC) Branch 5 na habambuhay na pagkakalulong kay Staff Sgt. Walter Candelaria ng Presidential Security Group (PSG) dahil sa paglabag sa Republic Act No. 9208 o qualified trafficking in persons at RA 7610 o Child Abuse. Gayundin, nahatulan ng korte si Angel Murillo, barangay chairman ng Brgy. San Miguel, Manila dahil naman sa kasong child trafficking.

Pero sa kabila ng tuwa dahil sa hatol sa nambugaw at gumahasa kay “Rose” tatlong taon na ang nakararaan, ikinalungkot naman ng Gabriela na sa mismong araw ng Idevaw, inilibing ang isang menor-de-edad na pinatay matapos dukutin at gahasain sa Mariveles, Bataan.

Ayon sa National Council of Churches in the Philippines (NCCP), aktibong kabataan ng simbahang Iglesia Filipina Independiente ang 14-anyos na biktimang si Denielle Evangelista Ferreria. Huling nakita si Evangelista noong Nobyembre 18, 2014 at natagpuan ang sunog niyang katawan makalipas ang dalawang araw.

“We are appalled that our young people become prey to senseless violence that ultimately destroy their lives and their future. Denielle exhuded life and hope. She was a consistent honor student and spent time serving her church as youth, choir member and altar girl. Lamentably, that vibrant life and hope has been snuffed tragically,” pahayag ni Rev. Rex Robles, pangkalahatang kalihim ng NCCP.

“Denielle deserves justice,nothing less,” sabi naman ni The Most Rev. Ephraim Fajutagana,Obispo Maximo XII ng IFI.

Sabi ng Gabriela, kailangan na humakbang at kumilos ang kabataan para supilin ang tumitinding karahasan sa kababaihan.

“Pabata nang pabata ang mga nagiging biktima. Ang ilan, walong taong gulang pa lang, biktima na at pinapatay pa. Mahalagang ituro sa kabataan na kailangang tumindig laban sa karahasan at panagutin ang gobyerno sa paglaganap ng mga krimeng ito, kasama na ang pagpapatuloy ng impunity (o kawalang pananagutan) sa ating lipunan,” sabi ni Joms Salvador, pangkalahatang kalihim ng Gabriela.

Sa datos ng Gabriela, mula 5,180 noong 2012, naging 6,432 noong nakaraang taon. Naitala din ang 16,517 kaso ng violence against women and children sa bisa ng RA 9262 o Anti- Violence Against Women and Children Act noong 2013. Malamang daw na mas malaki pa ang bilang dahil maraming hindi nagsusumbong at naiuulat dahil na rin sa takot ang mga biktima.

“Nakakagulantang ang agwat ng paglaki: 43 porsiyento ang itinaas kumpara sa 2012,” sabi ni Gabriela Women’s Party Rep. Emmi de Jesus.

Ang ikinababahala pa ng grupo ang pagdami ng nagiging biktima ng karahasan ng mga puwersa ng estado.

Binanggit ng grupo ang kaso ng isang 16-anyos na ina na pinasok daw sa bahay ng isang sundalo ng 84th Infantry Batallion ng Philippine Army habang wala ang kanyang asawa noong Nobyembre 17 sa Kitaotao, Bukidnon.

Sapilitan daw na kinuha ang kanyang anak na sumususo at ginahasa ang biktimang nakilala sa pangalang Julia.

Gayundin ang kaso ni “Sienna”, 16, na halinhinang ginahasa ng tatlong sundalo sa kanilang bahay sa Mindoro Occidental noong Mayo, 2013, na nagresulta sa pagkawala sa sariling katinuan ng biktima.

“Maaaring aabot pa sa daan-daan, kundi man libo ang babae at batang biktima, lalo na ng mga nasa kapangyarihan. Nakakalimutan na rin ang mga kaso, matapos ang makuha ang atensiyon ng midya,” dagdag ni Salvador.

Ayon pa sa Gabriela, daan-daang kababaihan at bata ang lumalapit sa kanilang opisina na humihingi ng payo at tulong para sa legal na laban.

“Karamihan sa kanila, nagsasabing wala silang ibang mapuntahan dahil binabalewala sila ng mga opisyal ng barangay, pulis at iba pang awtoridad ng gobyerno,” ani Salvador.

Dagdag pa niya, ang ilang biktima ng mga alagad ng batas ay nananahimik na lamang at hindi na nagsasampa ng reklamo dahil sa takot na may mangyari pa na mas malala sa kanila.

“Patunay ito na desperado ang mga biktima, at hindi nila pinagkakatiwalaan ang mga awtoridad. Totoong nagaganap ang impunity on violence against women sa panahong ito ni Pangulong Aquino,” ani Salvador.

Annual Comparative Statistics on Violence Against Women, 2004 – 2013

Source: Philippine National Police – Women and Children Protection Center (WCPC)