Hindi matatapos ang armadong paglaban ng mga mamamayan sa pagkawala ni Ka Parago.

Laman ng balita ang pagpatay ng militar kay Leoncio Pitao na kilala bilang Ka Parago ng 1st Pulang Bagani Command ng New People’s Army (NPA). Mula sa naunang mga balita, napag-alaman ng publiko na napaslang siya ng mga elemento ng 10th Infantry Division ng Armed Force of the Philippines (AFP) sa isang engkuwentro sa Barangay Panalum sa distrito ng Paquibato, Lungsod ng Davao. Nagbunyi ang militar at pamahalaan  sa tagumpay ng kanilang Task Force Minion upang hulihin o inyutralisa si Parago at para pahinain ang puwersa ng NPA sa Davao Region.

Maagap na naglabas ng paghayag ang Southern Mindanao Regional Party Committee ng Communist Party of the Philippines (CPP). Nilinaw nito na pinaslang si Parago at ang medic na si Vanessa “Ka Kyle” Limpag habang ginagamot ang una sa sakit na diabetes, hepatitis at hyperthyroidism.

Ayon pa sa pahayag na inilabas ng CPP, labag sa Rules of Engagement ng Geneva Conventions at Comprehensive Agreement on Respect for Human Rights and International Humanitarian Law (CARHRIHL) ang pagpatay sa ‘di armado at walang labang may sakit at medical personnel.

Maituturing na karuwagan ang ginawang ito ng AFP. Ipinagmamalaki nila ang kanilang nagawa na nakamit nila sa paraang labag sa batas ng digma. Sa pagkakapaslang kay Parago, pinag-aagawan naman ngayon ng mga heneral ng AFP ang P5.6 Milyong pabuya ng gobyerno sa pagpatay kina Ka Parago at Ka Kyle.

Sa pagkawala ni Ka Parago, hihina na raw ang NPA sa Davao Region, ayon sa AFP. Ilang ulit na nilang sinasambit ito. Ilang taon na nilang niloloko ang kanilang mga sarili.

Sa kasaysayan ng CPP-NPA, hindi humina ang rebolusyon sa pagkahuli o pagkawala ng mga lider nito. Noong nahuli ng pasistang rehimen ni Marcos si Jose Maria Sison, ibayong lumakas ang paglaban sa Martial Law ng mga mamamayan sa kanayunan. Hindi humina ang puwersa ng CPP-NPA kahit ibalita nilang patay na si Gregorio “Ka Roger” Rosal noong 2011. Hindi rin humina ang rebolusyon sa pagkahuli nina Benito Tiamzon at Wilma Austria-Tiamzon, mga aktibong peace consultant ng National Democratic Front of the Philippines (NDFP), nitong 2014 sa Cebu.

Napabulaanan din ang sinabi ng AFP na may leadership vacuum diumano ang CPP-NPA at nalalapit na pagkadurog ng mga puwersang rebolusyonaryo nang mahuli ang mag-asawang Tiamzon.

“We have a deep bench of trained and effective cadres to replace the Tiamzons,” ayon kay Luis Jalandoni, tagapangulo ng negotiating panel ng NDFP. Ayon pa kay Jalandoni, lalong lumalakas at lumalawak ang mga baseng masa ng CPP-NPA sa buong kapuluan. Umaabot sa 10,000 ang armadong lakas ng NPA na mahigit doble sa sinasabi ng AFP na 4,000.

Ang pagdagsa ng pagsuporta at pagpupugay ng mga mamamayan ng Davao at iba pang probinsiya sa Mindanao kay Ka Parago ay patunay na may malawak na suporta ng mga mamamayan ang rebolusyonaryong kilusan. Binaha ng kulay pula ang mga lansangan ng Davao sa libing ni Ka Parago nitong nakaraang Biyernes. Umabot sa higit 10,000 ang mga nagmartsa para ipakita ang kanilang paghanga sa isang lider na kanilang tinatawag na “Tatay.”

Karamihan sa mga samama sa huling pagbibigay-pugay kay Ka Parago ang mga magsasaka at katutubo na pumunta pa sa Lunsod ng Davao mula sa malalayong lugar at kabundukan ng Mindanao. Hindi maikakaila na malawak at malalim na ang nagawa ng CPP-NPA sa pagmumulat at pag-oorganisa ng masang anakpawis sa kanayunan.

Hindi gagap ng gobyerno at AFP kung bakit nagpapatuloy ang rebolusyon sa kabila ng kanilang pasistang counter-insurgency programs tulad ng Oplan Bayanihan ng rehimeng Aquino. Hindi nila alam ang dahilan ng mga mamamayan kung bakit patuloy na dumarami ang pulang mandirigma ng NPA at lalong lumalawak ang suporta ng masa sa hukbo ng mga mamamayan.

Makaisang panig na tinigil ng gobyerno ng Pilipinas (GPH) ang usapang pangkapayapaan sa NDF. Patuloy na paglabag at ‘di pagkilala ng rehimeng Aquino sa mga kasunduan tulad ng The Hague Joint Declaration, Joint Agreement on Safety and Immunity Guarantees (Jasig) at Carhrihl na nilagdaan sa pagitan ng mga naunang administrayon ng GPH at NDF. Hindi maihapag sa negotiating table ang Comprehensive Agreement on Socio-Economic Reforms (Caser) na uugat sa dahilan ng armadong tunggalian.

Hangga’t hindi nalulutas ang matinding kahirapan at paglabag sa mga batayang karapatan ng mga mamamayan, hindi titigil ang kanilang rebolusyon. Sisigabo ang suporta ng masa para sa kanilang hukbo na handang lumaban sa mga dambuhalang dayuhang negosyo at lokal na nananamantala. Patuloy na dadami ang mga pulang bagani tulad ni Ka Parago na mamumuno sa mga mamamayan para sa tunay na kalayaan at demokrasya.

Nangingig na sa takot ang nasa Malacañang.