Martsa ng 15,000 katao para sa hustisya kay Fr. Pops (Mga Larawan)
Hinatid sa kanyang huling hantungan ng mahigit 15,000 katao sa Kidapawan City si Father Pops. Humihiling sila ng hustisya para sa kanyang pagkamatay. Ang unang hakbang umano: pagbasura sa programang kontra-insurhensiya ni PNoy na Oplan Bayanihan.
Mahigit 15,000 katao, kabilang ang mga kaanak ng pinaslang na paring si Fausto “Fr. Pops” Tentorio, kaibigan, tagasuporta, katutubo, magsasaka, taong simbahan, human rights advocates at kabataan ang sumama sa martsa sa Kidapawan City para sa paghatid sa huling hantungin ni Fr. Pops at igiit ang hustisya sa pagpaslang sa kanya.
Isinisisi ng mga grupong pangkarapatang pantao sa programang kontra-insurhensiya ng administrasyong Aquino na Oplan Bayanihan ang pagpapatuloy ng pamamaslang sa mga aktibista, taong simbahan, at mga sibilyang itinuturing ng militar na lumalaban sa gobyerno. Si Fr. Pops umano ang ika-54 na biktima ng pampulitikang pamamaslang sa ilalim ng administrasyong Aquino.
