Istorya ng Linggo OFW

Ibigay ang sahod, benepisyo ngayon na – Saudi OFWs

February 26, 2022

Ang lakas-paggawa, agaran nilang naibigay noon. Pero ang karampatang bayad sa trabaho, wala pa sa sarili nilang bulsa.

“Kami yung OFW na namumulot ng basura sa Saudi.”

Naging emosyonal na si Victor Carreon nang ibahagi niya ang dinanas sa Saudi Arabia bilang overseas Filipino worker (OFW). Sa press conference ng Migrante International nitong Pebrero 16, siya at iba pang kapwa manggagawa ay isa-isang nagbahagi ng kuwento ng panggigipit ng kanilang mga ahensya at kompanya.

“Nag-Saudi ako para hindi lang mamulot ng basura doon,” sabi ni Carreon. “Pabalik-balik kami sa opisina. Ang sasabihin sa amin puro ‘bukas’. Bukas ka na lang bumalik,” dagdag niya. Nagtrabaho si Carreon sa Drake & Scull International, kompanya na may espesyalisasyon sa mechanical, electrical and plumbing contracting.

Screenshot mula sa online conference ng Migrante International

Pero kulang-kulang ang pasahod ng kompanya sa mga manggagawa. Kinailangan pang mangalakal ni Carreon at humingi ng pinansyal na suporta mula sa pamilya sa Pilipinas para lang may makain.

“Ang ginagawa sa amin ng kompanya, nilalayo sa opis nila para hindi ka makapagreklamo. Pero nagpumilit kami. Nandoon kami sa sulok ng disyerto, pero pumupunta pa sa ahensya,” kuwento niya. Para sa katiting na perang nahahawakan niya, dumagdag pa itong gastusin sa pamasahe.

Hulyo 31, 2016 natapos ang kontrata ni Carreon, pero 2017 pa siya nakauwi sa Pilipinas. Hindi ito naging masayang pagbabalik, dahil kinailangan niyang ibenta ang kanilang bahay para may pambayad sa utang.

Ito ang gantimpala niya sa halos siyam na taong pagtatrabaho.

Isa si Carreon sa libo-libong biktima ng hindi makatarungang pagpapasahod sa mga OFW sa Saudi. Lumipas na ang mga taon, pero iilan pa lang sa kanila ang nabigyan ng hustisya.

Bumulusok na ekonomiya

Patuloy na sinisingil ng gobyerno ng Pilipinas ang gobyerno ng Saudi Arabia ng USD 4.5 Bilyon halaga ng suweldo na hindi binigay o backpay, end of service benefits, at iba pang benepisyo na karapatan ng mga manggagawang pinauwi sa bansa. 

Sa pinakahuling bilang ng gobyerno ngayong Pebrero, may 11,000 na OFW ang kailangan bayaran ng Saudi matapos tanggalan ang mga ito ng trabaho dahil sa pagdausdos ng ekonomiya ng Saudi noong 2016 hanggang 2019.

Ipinangako ni Labor Secretary Silvestre Bello III noong Oktubre na maligayang magpapasko ang mga OFW dahil mareresolba ang isyu bago matapos ang 2021. Hindi ito nagkatotoo.

Dahil dito, sa unang dalawang buwan ng 2022, tuloy pa rin ang deployment ban ng gobyerno sa Saudi. Hindi bibigyan ng permiso ng gobyerno ang mga manggagawang Pilipino na pumunta sa Saudi, sabi ni Bello, hangga’t hindi nasisiguradong itatrato sila nang maayos.

“Hindi dapat sila minamaltrato, kaya gusto ko mabayaran muna yung 11,000 [na OFW]. Limang taon na pending ang claims nila,” sabi ni Bello. Kaya hangga’t hindi ito nareresolba, ani Bello, wala siyang makitang dahilan para bawiin ng Department of Labor and Employment (DOLE) ang deployment ban.

“Anumang oras mula ngayon, makakatanggap ako ng imbitasyon,” sabi ni Secretary Bello, “At oras na makuha ito tutuloy ako sa Kingdom of Saudi Arabia para magpakita ng representasyon sa Minister of Justice, para maibigay ang hustisya sa mga kapwa Pilipino.”

Ayon kay Joanna Concepcion, tagapangulo ng Migrante International, dahil sa panglahatang deployment ban sa Saudi, nadadamay ang mga manggagawang Pilipino na wala namang kinalaman sa isyu.

Base sa datos ng Bangko Sentral ng Pilipinas, ang Saudi Arabia ang ikatlo sa mga bansang mayor na pinagmumulan ng cash remittances nitong nakaraang taon. Sa pagtatapos ng 2021, umabot ng higit USD 1.8 Milyon o lagpas P90-M ang cash remittances mula sa Saudi.

Litrato ng Philippine Embassy sa Riyadh

Maliit na bilang naman ang 11,000 kung ikukumpara sa ipinapanawagan ng Migrante na suporta para sa 50,000 na OFW.

“Yung bilang na 50,000 nagmula sa estimate ng global chapter ng Migrante sa Saudi Arabia, noong 2016 pa lamang na lumalapit na sa amin yung mga affected OFW na natanggalan ng trabaho. Mula sila sa maliliit at malalaking kompanya,” sabi no Joanna.

Pangamba nila sa Migrante International, baka yung numero ng gobyerno na 11,000 ay bilang lang ng nagmula sa malalaking kompanya tulad ng Mohammad Al Mojil Group at Saudi Oger Limited.

Ayuda sa OFW 

Sa kabila ng mga isyu na ito, nagkaroon ng “inisyal na tagumpay” ang mga Saudi OFW nang pakinggan ng gobyerno ang panawagan para sa ayuda, habang hinihintay pa ang resulta ng paniningil sa Saudi.

Nitong Enero, inanunsyo ng Overseas Workers Welfare Administration (OWWA) na maglalaan sila ng P300-M para bigyan ng cash aid ang mga repatriated na OFW galing Saudi na pinauwi mula Enero 2016 hanggang Disyembre 2019. Iba pa ito sa pondo na sinisingil mula sa gobyerno ng Saudi.

“Dahil sa panawagan natin na mabigyan ng ayuda ang mga Saudi OFWs na natanggalan ng trabaho dulot ng Saudi Crisis 2016-2019, matagumpay na naitulak ang DOLE na mabigyan ng ayuda ang mga apektadong OFWs,” sabi ng Migrante International sa isang pahayag.

Noong Pebrero 7, ayon sa OWWA Regional Welfare Office III, nabigyan nila ng tulong pinansyal ang 31 na OFW na pinauwi mula Saudi. Sa ilalim ng Financial Relief Assistance Program (FRAP), nakatanggap ng tig-P10,000 ang mga OFW.

Pasok sa panahon na kailangan para makakuha ng ayuda mula sa FRAP si Carreon, dahil 2017 siya nakauwi sa bansa. Pero hanggang ngayon, aniya, wala pa siyang nakukuha ni singkong duling, kasama ang iba pang naroon sa press conference.

Dahil dito, tuloy ang panawagan ni Carreon, kasama ng Migrante at iba pang organisasyon, para sa direktang suporta mula sa gobyerno. Kagyat ito na karapatan, anila, dahil doble na ang pasakit kung pati sa mismong bansa parang kailangan nila manlimos.

Nananawagan sila ngayon kina Sec. Bello, Pangulong Duterte, at sa iba pang kagawaran na siguruhing maaksyonan na ang kanilang panawagan ng hustisya sa sahod at benepisyo mula Saudi, habang naririto pa silang mga OFW na binabansagang bagong bayani.

Ang ilan kasi sa kanilang mga manggagawa na mula 2016 pa naghihintay, namatay na. Pero ang hustisya, inaabangan pa rin ng mga pamilya.


Featured image: Litrato ng Migrante International ng OFWs na nagtrabaho para sa Rajeh H. Al-Marri & Sons Co.
Avatar

Andrea Jobelle Adan

Si Joby Adan ay nagtapos nang may karangalan ng kursong Pamamahayag sa UP College of Mass Communication sa Diliman, Quezon City. Dating intern, isa siya ngayon sa mga pinakabatang istap ng PW.