Sa loob at labas ng korte, bantay sarado si dating Hen. Jovito Palparan ng armadong mga puwersa ng Philippine National Police, Armed Forces of the Philippines, National Bureau of Investigation at  Special Weapons And Tactics habang isinasagawa ang pre-trial hearing sa kaso nito sa Malolos Regional Trial Court (RTC). 

Ikinagalit ng mga kaanak ang anila’y labis na pagpoprotekta sa isang pangunahing suspek sa pagdukot at pagpatay sa mga aktibista at paglabag sa karapatang pantao ng maraming sibilyan noong aktibo pa ito sa militar.

“Overkill ang seguridad na ibinigay nila kay Palparan. Parang isang diva ang turing ng gobyerno sa isang berdugo,” ani Aya Santos, pangkalahatang kalihim ng Desaparecidos, grupo ng mga kaanak ng mga biktima ng sapilitang pagkawala o enforced disappearances.

Sa naturang pagdinig sa korte, muling hiniling ni Palparan na mailipat siya sa PNP Custodial Center sa Camp Crame o kustodiya ng militar. Nakasaad sa mosyon ng mga abogado ng retiradong heneral na nanganganib daw ang kanyang buhay sa  Bulacan Provincial Jail dahil sa may mga miyembro daw ng New People’s Army na nakakulong doon.

(Tunghayan: Infographic hinggil sa mga biktima ni Palparan sa iba’t ibang probinsiya)

Ayon kay Edre Olalia, isa sa mga abogado ng mg biktima at pangkalahatang kalihim ng National Union of People’s Lawyers (NUPL), “halata” na naghahanap ng dahilan si Palparan para malusutan at maiwasan niya ang ordinaryong kalagayan bilang bilanggo sa ordinaryong piitan. 

“Una, sabi niya gusto niya sa NBI, tapos sa PNP Custodial Center, tapos gusto niya sa Army Custodial Center. Ngayon, sa Isafp (Intelligence Service of AFP) naman,” ani Olalia.

Bukod sa mosyon na mailipat, nagsampa rin ang kampo ni Palparan ng mosyon ng pagbasura sa kanyang kaso.  “Matagal nang may desisyon ang Court of Appeals diyan with finality, kaya hindi puwede ang gusto niya,” sabi pa ni Olalia.

Para sa naturang abogado ng mga kaanak ng mga biktima, taktika ng kampo ni Palparan ang mga mosyon para tumagal ang aktuwal na pagdinig sa kaso. 

“It’s flimsy and frivoluous,” sabi pa ni Olalia, tungkol sa mga mosyong inihain ng mga abogado ni Palparan.

Kasabay ng pagdinig, sinabayan din ng isang maliit na grupo na pabor sa pagpapalaya ni Palparan ang kilos-protesta ng mga kaanak ng mga biktima ni Palparan. Pero hindi nagpatinag ang grupo ng mga tagapagtaguyod ng karapatan sa anila’y probokasyon ng mga nagpakilalang mga asawa daw ng mga sundalo.

“Nakakalungkot (kami) na may naniniwala pa kay Palparan na isang berdugo,” sabi ni Linda Cadapan, ina ng nawawalang estudyante ng Unibersidad ng Pilipinas na si Sherlyn.  Dismayado rin silang dalawa ni Connie Empeno, ina ng kasamahan ni Sherlyn na si Karen, sa tinakbo ng unang pagdinig sa kaso ni Palparan.

“Hindi na dapat pinakikinggan ‘yang mga mosyon niya. Naghahanap lang siya ng convenience niya,” dagdag ni Cadapan.

“Hindi ko ikinahihiya na aktibista ang anak kong si Karen. Siya ang nagturo sa akin ng katotohanan na kailangan baguhin ang lipunan, Bakit  kaming mga ina ang sinisisisi sa kanilang pagkawala? Dapat sisihin si Palparan,” sabi naman ni Empeno, patungkol sa pasaring ng asawa ni Palparan na kasama sa mga kabilang grupo.

Itinakda ng korte ang susunod na pagdinig sa Lunes, Setyembre 8.