Sa ilalim ng pamahalaang hindi nila naasahang sumagip sa kanila sa panahon ng panganib, naipamalas nilang sa kanilang pagkakaisa'y kaya nilang magpunyagi at makaahon. Narito ang mga larawan at dalawang artikulo hinggil sa relief efforts sa Kamaynilaan ng militanteng mga organisasyon matapos ang pagragasa ng bagyong Ondoy.
Muli, ilang imahen noong Sabado, sa pagragasa ng bagyong Ondoy sa Kamaynilaan. Narito rin ang ilang imahen ng pag-asa: ang mga unang hakbang sa pagbangon matapos ang matinding kalamidad.
Maralita ang mayorya sa daan-daan libong nabiktima ng bagyong Ondoy noong Setyembre 26. Sila iyong mga nakatira sa mga barung-barong sa mga laylayan ng lungsod, sa mga tabing-ilog at mabababang lugar. Ito ang mga larawan ng tatlong maralitang komunidad sa Quezon City na nasalanta ni Ondoy, pero lumalaban.
Sa Brgy. Maybunga, Pasig City, abot ang tubig hanggang sa tulay mismo noong kasgsagan ng baha. Libong pamilya ang naninirahan sa gilid ng floodway. Sa naturang barangay, naging evacuation center ang Brgy. Maybunga Elementary School. May 2,000 katao ang naririto sa kasalukuyan. Mga residente na nakatira sa gilid ng floodway. Walang punto para sa kanila ang bumalik sa bahay nila sapagkat sira na ang mga ito.
Mga kuwento ng trahedya at hinagpis sa Brgy. Bagong Silangan, Batasan, Quezon City. Sa plaza ng barangay, tuluy-tuloy ang pagdating ng mga labi ng nasawing mga residente -- biktima kapwa ng kalamidad at kapabayaan.
Kakarampot ang tulong na natatanggap ng mga biktima ng bagyong Ondoy sa isa sa pinakanasalantang lugar sa Kamaynilaan. Samantala, abala ang gobyerno sa pagpapaganda muli ng siyudad, at hindi sa pagtugon sa kumakalam na sikmura ng mga residente dito.
Libing na pangmaramihan ang nagaganap ngayon sa mga maralitang komunidad gaya ng Brgy. Bagong Silangan sa Batasan, Quezon City. Dito masisilip ang mukha ng trahedya ng pananalasa ng bagyong Ondoy at kapabayaan diumano ng gobyerno.
Hangad ng mga demonstrador ang katarungan para sa mga biktima ng paglabag sa karapatang pantao, kapwa sa ilalim ng adminstrasyong Marcos at Arroyo.
