Nagpapatuloy ang mga atake sa karapatan ng mga militante, lider-obrero at kahit sa mga sibilyan. Bago matapos ang taong 2012, iniulat ng iba’t ibang grupong pangkarapatan sa iba’t ibang probinsiya ang panghaharas, pagsampa ng gawa-gawang mga kaso at pag-aresto sa kanila — sa ngalan ng giyera kontra-insurhensiya ng Oplan Bayanihan.

Isa na rito, ayon sa Kilusang Mayo Uno (KMU), sentro ng militanteng unyonismo sa bansa, si Rico Pepito, pangulo ng unyon sa Foremost Farms Inc. na pag-aari ng dambuhalang negosyanteng si Lucio Tan. Inaakusahan si Pepito na miyembro raw ng rebeldeng New People’s Army (NPA).

Samantala, inireklamo rin ng KMU ang pagsampa sa gawa-gawang mga kaso laban sa mga lider-obrero nila na sina  Ronald Ian Evidente, tagapagsalita ng KMU-Negros; Roy Velez, tagapangulo ng KMU-NCR; Amelita Gamara, pangalawang pangkalahatang kalihim ng KMU-NCR; at Hermenegildo Marasigan, tagapangulo ng KMU-Southern Tagalog na kinasuhan naman kaugnay sa isang kilos-protesta laban sa militarisasyon sa Timog Katagalugan.

Bago rin matapos ang taong 2012, ilegal na inaresto ng mga militar at kapulisan ang dalawang aktibista sa magkahiwalay na lugar. Inaresto ng mga puwersa ng Philippine National Police Region II si Rene Boy Abiva, isang social worker ng  Department of Social Welfare and Development (DSWD) sa Tuguegarao City. Miyembro rin ng Alliance of Concerned Teachers (ACT) sa Cagayan Valley si Abiva.

Inaresto rin ang sibilyang si Oligario Sebas ng pinagsanib na puwersa ng Philippine Army at Philippine National Police noong Disyembre 25 sa Tubod, Manjuyod, Negros Oriental. Napagkamalan umano si Sebas bilang isang “Felimon Mendrez” na isa raw na “mataas na lider ng NPA” na may  pabuyang  PhP5.25-Milyon.

Panghaharas sa lider-obrero

Noong Disyembre 28, dalawang naka-sibilyang kagawad ng militar ang pumunta sa bahay ni Pepito at nagtanong sa kanyang asawa sa kanyang kinaroroonan. Nagpakilala umano ang isa sa mga militar na si Samuel Pineda ng Philippine Army.

Bumalik ang mga militar kinabukasan, sakay ng isang motorsiklong may plakang WI-6015. Tinanong si Pepito kung may kaugnayan siya sa isang nagngangalang “Jonas” na responsable raw sa “panghihingi ng revolutionary tax” sa kompanya. Ayon pa sa KMU, tinanong din si Pepito tungkol sa mga aktibidad ng unyon. Ang sabi pa sa kanya, “Masyadong malaki ang hinihingi ninyo sa kompanya. Huwag lang namin malalaman na may kaugnayan kayo sa sinasabi naming tao.”

Sinabi ni Elmer Labog, tagapangulo ng KMU, na tila “buhay na buhay” sa gobyerno ni Aquino ang dati nang taktika ng nakaraang rehimeng Arroyo na iugnay ang mga unyonista sa mga aktibidad ng NPA.

Patuloy pa rin ang panghaharas sa mga lider-obrero na ibinabatay sa aktibidad ng ibang tao.

Sinabi pa ng grupo na may namamayaning tensiyon sa kompanya, matapos magsampa ng apela ang mga manggagawa laban sa ibinigay na eksempsiyon sa kompanya na magbigay ng P30 na Emergency Cost of Living Allowance, gayundin ang paggiit ng mga manggagawa sa iba pa nilang benepisyo na patuloy na ipinagkakait.

“Ginagamit ni Tan ang militar para iharas ang mga manggagawa sa pagtatangka nilang pasukuin ang mga ito,” ani Labog.

Pag-aresto, gawa-gawang kaso

Samantala, ilegal na inaresto ng mga militar at kapulisan ang dalawang katao sa magkahiwalay na lugar bago matapos ang taong 2012.
Inaresto ng mga puwersa ng PNP Region II si Rene Boy Abiva, social worker ng Department of Social Welfare and Development (DSWD) sa Tuguegarao City.

Ayon sa grupong pangkarapatang pantao na Taripnong-Cagayan Valley, inaresto si Abiva noong Disyembre 28 at kinasuhan ng kasong murder kaugnay sa isang ambus ng NPA sa Tinoc, Ifugao noong Abril 2012. Sa bisa ito ng mandamyento na ipinalabas ng Regional Trial Court 14th Branch sa Lagawe, Ifugao noong Nobyembre 2012.

Pero ipinahayag ng Taripnong-Cagayan Valley na gawa-gawang kaso ang isinampa laban kay Abiva. Anila, kahit pumupunta si Abiva sa malalayong komunidad ng mga mahihirap para magproseso ng mga papeles pasa sa programa ng Conditional Cash Transfer ng DSWD, hindi umano siya umabot sa Ifugao.

“Inaakusahan si Abiva ng pagpatay sa Tinoc, pero hindi siya umabot doon kahit sa pagsisimula ng trabaho niya bilang social welfare officer ng siyudad,” pahayag ng grupo.

Talamak na rin ang pag-aaresto ng mga awtoridad sa mga sibilyan at pinagbibintangang sila’y mga lider-rebelde — para lamang makuha ang pabuya sa pag-aresto sa naturang mga rebelde.

Ayon sa Karapatan-Negros, nagpapahinga si Sebas noong Disyembre 25 nang pasukin ng mga militar ang kubo ng sakiting si Sebas.

Pinakitaan ng mga pulis si Sebas ng warrant of arrest para sa isang “Felimon Mendrez.” Sinabi pa ng grupo na hinalughog din ang bahay ni Sebas at kinumpiska ang telepono ng asawa para hindi makahingi ng anumang tulong para sa biktima.

Kasalukuyang nakakulong ang biktima sa BJMP District Jail sa Bayawan City.

“Mukhang nagkakandarapa ang administrasyong Aquino at ang militar na magpakita ng kanilang tagumpay sa pagkamit ng kanilang target na paglipol sa mga rebelde sa pamamagitan ng Oplan Bayanihan. Pero ang resulta nito’y ang mga malala, ilegal at kaduda-dudang pag-aresto at pagsampa ng mga kaso laban sa mga aktibista at indibidwal na tinatagurian nilang mga komunista,” ani Jose Luis Blanco, pangkalahatang kalihim ng Karapatan-Negros.