Pinuna ng grupong pangkarapatang pantao na Karapatan ang pagbuo ng administrasyong Aquino ng isang “superbody” na iimbestiga sa mga kaso ng pagpatay, pagkawala, tortyur at iba pang mga kaso ng paglabag sa karapatang pantao.

“Parang nakakaloko naman ito,” ani Cristina Palabay, pangkalahatang kalihim ng Karapatan sa pagkakabuo ng inter-agency. Aniya, kuwestiyonable ang kredibilidad ng naturang grupo dahil sangkot ang AFP at PNP sa mga paglabag.

“Paano iimbestigahan ng body na ito ang mga kinasasangkutang kaso ng AFP? Pawang mga kasinungalingan at pagtanggi na naman ang maririnig natin mula sa kanila,” sabi ni Palabay.

Sa Administrative Order 35 na pinirmahan ni Pangulong Aquino noong Nobyembre 22, binuo ng pangulo ang siyam na kataong bubuo sa Inter-agency committee on Extra-Legal Killings, Enforced Disappearances, Torture and Other Grave Violations of the Right to Life, Liberty and Security of Persons.

Kabilang sa inter-agency na superbody ang chief of staff ng Armed Forces of the Philippines (AFP), mga direktor ng Philippine National Police (PNP) at National Bureau of Investigation (NBI), mga sekretaryo ng Department of Interior and Local Government (DILG) at Department of National Defense (DND), mga tagapayo sa peace process at political affairs at ang tagapangulo ng Presidential Human Rights Committee.

Pamumunuan ang grupo ng sekretaryo ng Deaprment of Justice (DOJ).

Ayon sa DOJ, tungkulin ng inter-agency ang paglutas sa mga kaso, pangunahin na sa mga high-profile na kasong naganap sa panahon ni dating pangulong Gloria Macapagal-Arroyo, at pag-imbestiga sa mga bagong kaso.

Para sa Karapatan, kung tunay na para sa hustisya at karapatang pantao ang gobyerno, dapat na abandonahin nito ang kontra-insurhensiyang programa nito na ang Oplan Bayanihan. Kung hindi, walang silbi ang superbody sa mga bikitima at kaanak nila,” ani Palabay.

Sinabi pa ni Palabay na nagpapatuloy ang mga pamamaslang at kahit ni isa’y walang nasasakdal sa 114 na biktima ng pampulitikang pamamaslang sa panahon ng administrasyong Aquino.

“Ano ngayon ang katiyakan na malulutas ng special team na ito ang estra-hudisyal na mga pamamaslang?” tanong pa ni Palabay.

Binatikos din ng Karapatan ang deklarasyon ng superbody na ito na iimbestigahan din nila ang mga kasong paglabag diumano ng “non-state actors.”

Palalabuin lamang nito ang isyu hinggil sa pangunahing responsabilidad ng mga puwersa ng estado sa mga abuso, pagtatapos ni Palabay.