Nagpiket ang mga manggagawa ng Kilusang Mayo Uno (KMU) sa Davao City sa pagdating ni Sek. Rosalinda Baldoz sa naturang lungsod. Binabatikos ng militanteng mga obrero ang kainutilan umano sa pagpaptupad ng makatao at maka-manggagawang mga istandard sa paggawa sa bansa. Bumisita si Baldoz sa Davao para sa induction ng Regional Tripartite Industrial Peace Council doon. (Karlos Manlupig)
Patuloy na nagbibingi-bingihan at nagbubulag-bulagan ang administrasyong Aquino sa malalang lagay ng karapatang pantao sa bansa, ayon sa grupong pangkarapatang pantao na Karapatan, sa okasyon ng ika-39 anibersaryo ng batas militar ng diktadurang Marcos.
Iginiit ng mga empleyado sa Mataas na Kapulungan ng Kongreso ang panawagan ng mga kawani ng gobyerno para sa P6,000 na dagdag sa kanilang buwanang suweldo.
Tutol sa pagpabor ng Malakanyang sa malawakang tanggalan sa Philippine Airlines (PAL), na pag-aari ni Lucio Tan ang isang bagong network ng mga taong simbahan, obrero at labor advocates.
Nagbigay ng bouquet ng bulaklak na may nakasulat na "No to Budget Cut!" si Student Regent Krissy Conti kay Miss Universe 3rd Runner Up Shamcey Supsup. Bumisita si Supsup sa Unibersidad ng Pilipinas matapos ang matagumpay na paglahok sa pandaigdigang pageant noong nakaraang linggo. Kasama sa tumanggap kay Supsup ang mga opisyal ng pamantasan na sina UP Diliman Chancellor Caesar Saloma at UP President Alfredo Pascual. Nakatakdang magwelga ang mga estudyante ng UP at iba pang state colleges and universities sa Setyembre 21 hanggang 23 para iprotesta ang pagkaltas ng gobyernong Aquino sa badyet ng edukasyon. (Airnel Talatala Abarra)
Nagmartsa patungong Mendiola ang mga lider-kababaihan ng Gabriela mula sa iba't ibang bahagi ng bansa para manawagan ng pagpapalaya ng mga bilanggong pulitikal, kabilang ang 30 kababaihang bilanggong pulitikal. (KR Guda)
Nagtipon sa pambihirang pagkakataon ang ilan sa 12 senador na bumoto para ibasura ang pananatili ng baseng militar ng US sa bansa noong taong 1991. Sa kabila ng presyur ng gobyernong US at Cory Aquino, bumoto ang Senado, 12-11, para ibasura ang ekstensiyon ng baseng militar ng US sa Clark, Pampanga at Subic, Zambales -- isang pambihirang pagkakataon na pagpapapmalas ng makabayang paninindigan ng Senado. Ginanap ang pagtitipon sa Club Filipino, San Juan noong Setyembre 16, ika-20 anibersaryo ng makasaysayang pagboto sa Senado. (Boy Bagwis)
Hindi lamang isyu ng sektor ng transport ang pagtaas ng presyo ng langis. Kung gayon, ayon sa militanteng mga organisasyon, hindi lamang sektor ng transport ang dapat magwelga sa Lunes, Setyembre 19. Iba't ibang organisasyon ng mga maralitang sektor ang maglulunsad ng "protestang bayan" para igiit ang mga panawagang labanan ang P9 overpricing sa langis, EVAT sa langis, at Oil Deregulation Law.
Sa pangunguna ng Bagong Alyansang Makabayan (Bayan), ginunita ng mga militante sa pamamagitan ng protesta sa harap ng embahada ng US ang pagbasura sa pagpapalawig ng RP-US Military Bases Agreement. Sa ilalim ng kasunduang ito, nagmantine ang militar ng US ng tiyak na mga baseng militar sa Clark, Pampanga at Sublic, Zambales. Taong 1991 nang ibasura ng Senado, sa botong 12-11, ang pagpapalawig sa implementasyon ng naturang kasunduan. (Macky Macaspac)
“Strike back!” Ito ang mensahe ng mga estudyante ng Unibersidad ng Pilipinas sa Diliman, Quezon City na nag-ingay at nagmartsa sa loob ng kampus para manawagan sa mga estudyante na kumilos kontra sa kaltas-badyet ng administrasyong Aquino sa sektor ng edukasyon.
