Patuloy ang paggiit ng mga manggagawang bukid sa kanilang karapatan sa lupain ng asyenda. Ang pinakahuling hakbang: pagbubungkal at pagtanim sa lupang binakuran ng isang bangko na di-makatarungang pinagbentahan ng pamilyang Cojuangco-Aquino.
Anumang pag-usad ng kaso ng mga paglabag ng karapatang pantao, ito’y dahil sa pagpupursigi ng mga kaanak at grupong pangkarapatang pantao. Sabi nila, walang itinutulong ang gobyernong Aquino para maresolbahan ito. Malala pa, ipinagpapatuloy pa ni PNoy ang sa esensiya’y parehong madugong programang kontra-insurhensiya ng nakaraang administrasyon.
Pagkakaisa laban sa imperyalismo at tiraniya, at para sa karapatan at kaunlaran ng mga mamamayan ng mundo ang nilayong mabuo ng mga aktibista mula sa iba't ibang panig ng daigdig na dumalo sa ikaapat na pandaigdigang asembliya ng International League of Peoples' Struggles o ILPS.
Bidyo ng marahas na pagdispers ng mga pulis sa mga aktibistang nagrali sa harap ng embahada ng US para kondenahin ang anila'y di pantay na relasyon ng Pilipinas at US. Ipinamalas ng insidente, ayon sa mga aktibista, kung sino ang tunay na pinaglilingkuran ng mga pulis.
Sa larangan ng ekonomiya, paggalang sa karapatang pantao, pag-empleyo at makabuluhang dagdag-sahod, industriyalisasyon at tunay na repormang agraryo -- at iba pang usapin -- bagsak na bagsak si Pang. Benigno Aquino III sa mata ng militanteng mga organisasyon.
Sa araw na ginugunita ang Stonewall Riots sa New York 42 taon na ang nakararaan, nagmartsa ang mga miyembro ng LGBT community sa UP Diliman at Baguio kamakailan para ipagdiwang ang kanilang identidad at ipaglaban ang kanilang karapatan at labanan ang diskriminasyon.
Sa araw na ipinagdiwang ng United Nations ang International Day in Support of Victims of Torture noong Hunyo 26, ginugunita rin ang pagdukot kina Sherlyn Cadapan, Karen Empeno, Manuel Merino, Prudencio Calubid, Celina Palma, Gloria Soco at Ariel Beloy. Sa kaso nina Cadapan, Empeno at Merino, malinaw sa mga testimonya na tinortyur sila. Ayon sa mga grupong pangkarapatang pantao, malinaw na polisiya pa rin ng militar ang magtortyur.
Sinasabi ng administrasyong Aquino na pinangangambahan nito ang presensiya ng mga sasakayan ng China sa Spratlys. Pero tila nakakasangkapan lamang ito sa pagtutulak ng US na panatilihin at palakasin ang mga negosyo nito sa Pilipinas at Timog Silangang Asya, at kontrolin ang lumalakas na impluwensiya ng China sa rehiyon.
Tatlong taon nang ipinapatupad ng Cheaper Medicines Act. Pero patuloy pa ring hirap ang mga mamamayan na makaakses sa mura at esensiyal na mga gamot. Para sa mga kritiko ng batas, lalong pinalala lamang nito ang masama nang kalusugan ng mga mamamayan.
Suportado ng Pambansang Kamao ang panukalang P125 across-the-board wage hike para sa mga manggagawa. Para sa mga manggagawa, malaking bigwas ito laban sa pambubusabos at pagmamaramot ng mga kapitalista. Malakas na bigwas ito laban sa barya-baryang COLA na abuloy ng administrasyong Aquino.
